چه‌ن هه‌ناسه‌یه‌کی شیعری

-1-

تا دوور نه‌بووی نه‌م ئه‌زانی

که‌ ئه‌وه‌نده‌ پێویستی بۆم..

ئێستا ئه‌زانم بوونی تۆ

وه‌ک هه‌ناسه‌ و دڵ وایه‌ بۆم.. 

-2-

جێم مه‌هێڵه‌

کوا دڵی من به‌رگه‌ی

ته‌نیایی گرتووه‌..

هه‌ر چرکه‌یه‌کی بێ تۆی

به‌ ساڵانێ لێ ڕۆشتووه‌..

-3-

هێنده‌ چاوه‌ڕوانم کردی

ڕووناکی له‌ چاوما نه‌ما..

هیواکانم هه‌موو خنکان

له‌ ناو ده‌ریای ئه‌شک و خه‌ما..

-4-

به‌ شه‌ماڵی لای ئێوارا

نامه‌یه‌کم بۆ بنێره‌..

دڵ به‌رگه‌ی بێ تۆی ناگرێ

که‌م به‌ ته‌نیایی بسپێره‌..

-5-

خۆشم ئه‌وێی

نازانم بڵێم هێنده‌ی چی!

ته‌نها ئه‌وه‌نده‌ ئازانم،

هه‌موو چرکه ‌و هه‌موو ساتێ

به‌ ناو دڵما دێیت و ئه‌چی!..

-6-

ژیان ئازاری زۆری پێ چه‌شتووم

هه‌ر خه‌م ئامێزم بۆ ئه‌کاته‌وه‌..

مردن وه‌ستاوه‌ له‌ ده‌رگام ئه‌دا

نازانم دڵم بۆ نایکاته‌وه‌..

-7-

دیسان خه‌م هێرشی هێنا

وێرانی کرد ته‌لاری دڵ..

زه‌رده‌خه‌نه‌ی ڕووی تۆرانم

هیواکانمی خسته‌ ژێر گڵ.. 

گه‌لاوێژ حه‌مه‌ قادر

 2009

بیستم گله‌یت کردووه‌

بیستم گله‌یت کردووه
گوایا ڕۆژی ڤالانتاین
من تۆم فه‌رامۆش کردووه‌
باوانه‌که‌م..
ڤالانتاین که‌ی جه‌ژنی منه‌؟
جه‌ژنی من ته‌نها نه‌ورۆزه
له‌و ڕۆژه‌یا
لێت ئه‌که‌م جه‌ژنه‌ پیرۆزه..
من له‌ بری
هه‌ر گوڵێکی بێ ڕه‌نگ و بۆی
درووستکراو..
خۆم به‌ به‌هارێ نێرگز و
دڵێکی پڕ له‌ عیشق و سۆز
دێمه‌ حوزورت و پێت ئه‌ڵێم
باوانه‌که‌م جه‌ژنت پیرۆز..
 

تابلۆی خه‌م

ئێواره‌یه‌ و به‌ دڵته‌نگی
له‌ سوچێکی ئه‌م ژیانه‌ پڕ خه‌مه‌دا
ڕاوه‌ستاوم،
به‌ بێده‌نگی له‌ ناخه‌وه‌ ئه‌سووتێم و
بۆ دووری تۆ
کڵپه‌ی دێ جه‌رگ و هه‌ناوم..
له‌م ئێواره‌ بێ تۆییه‌دا چاوه‌ڕوانم
چرپه‌ی تۆ بێ به‌ میوانم
تا ساڕێژکا
برینی ڕۆحی سووتاوم.
ڕۆژ کۆچ ئه‌کا و شه‌ویش دادێ
نه‌ گوێم له‌ چرپه‌ی تۆ ئه‌بێ و
نه‌ سووتانی ده‌روونیشم
خامۆش ئه‌ بێ!..
 

چه‌ن هه‌ناسه‌یه‌ک له‌ هه‌ناسه‌ شیعریه‌‌کانی گه‌لاوێژ حه‌مه‌ قادر
-1-
که‌ بیرت لێ ئه‌که‌مه‌وه‌
لێوان لێو ئه‌بم له‌ عیشق و
خۆشه‌ویستییه‌کی بێ سنور!
که‌ دێیته‌ ناو خه‌ونێکمه‌وه‌
ئه‌و شه‌وه‌م پڕ ئه‌که‌ی له‌ نوور..

-2-
خۆشه‌ویستیت سیروانێکه‌
هاژه‌ی دێ له‌ عیشق و
جوانی..
ئاسمانێکه‌ زریوه‌ی دێ
له‌ گوڵه‌ ئه‌ستێره‌ی
شادمانی..

-3-
شه‌وان به‌ چاوی ئه‌ستێره‌وه‌
لێت ئه‌ڕوانم،
له‌ به‌رزایی ئاسمانه‌وه‌
له‌و دووره‌وه!
‌هێنده‌ جوان و
میهره‌بانی
کت و مت هه‌ر ئه‌ڵێی مانگی و
له ‌سه‌ر زه‌ویا خوڵقاوی..

-4-
شه‌و به‌ ئه‌ستێره‌وه‌ جوانه‌
ڕۆژ به‌ خۆر و
خۆریش به‌ ئاوابوونه‌وه‌
من و شیعریش
ته‌نها به‌ خۆشه‌ویستی تۆوه‌!

-5-
چه‌ن غه‌ریبیت ئه‌که‌م
گوڵم!
بێ تۆ په‌رێشانه‌
دڵم..
ئه‌و ساتانه‌ی
که‌ لێم ونی،
ڕووناکی تیا نیه
‌ دڵم..
گه‌لاوێژ حه‌مه‌ قادر
ده‌ربه‌ندیخان

glara_79@hotmail.com
 

ماڵپه‌ڕی ئاری بکه به ماڵپه‌ڕی ده‌ستپێک  

مافی پارێزراوه‌ بۆ ماڵپه‌ڕی ئاری 

 نوێ کراوه‌ته‌وه‌ له‌ به‌رواری 13/10/2009